「真梁粉」周浩鼎 率先表態撐CY連任

【明報專訊】下屆特首選舉即將開跑，但邊個係「真命天子」，唔少政壇人士仍未「買定離手」 。不過，青年時事評論員協會主席、民建聯副主席周浩鼎（Holden）噚日同傳媒茶敘時，率先表態，認自己係「真梁粉」，如果梁振英（CY）競選連任，佢會第一個站出嚟力撐，似乎已將賭注全盤押喺CY身上。


青評會最少5人想區選

青評會話咁快已成立咗3年，成員經常喺各報刊撰文評論時事，但佢哋除咗講得，其實都打得。區選將至，佢哋至少有5個人積極考慮參選，包括新民黨甘文鋒、自由黨李梓敬、民建聯洪錦鉉及Holden本人等。不過下星期五就到區選開始報名，根據選舉條例，相信候選人參選後都要停筆一段時間，靠其他兄弟多多發聲。


由建制派第二梯隊組成嘅青評會，約咗已退出公民黨嘅湯家驊周五食飯，探討一下青評會同湯家驊嘅「民主思路」有無合作空間，了解民主思路運作同定位。