Backstage 10月回歸 「自由約」開戶外影院

【明報專訊】上月底不敵中環貴租嘅Backstage Live Restaurant宣布回歸，不過就以另一方式同大家見面，就係下個月同西九文化區管理局合作搞「自由約」，將苗圃公園化身成免費嘅戶外電影院，亦邀請唔少歌手表演。Backstage官方facebook話，Backstage精神唔再局限四面牆，會讓呢份堅持同熱誠延續落去。


Emily睇過下個月自由約嘅節目，以往每月第二個周日先舉行嘅自由約，今次就一連兩日喺10月10至11號舉行，每晚會播一套戲，周六晚播《約翰連儂：不羈前傳》，講述約翰連儂創立披頭四前嘅音樂歷程；周日晚就播《馬利》，圍繞牙買加「雷鬼教父」巴布馬利（Bob Marley）嘅傳奇一生。


另外，周日下晝仲有唱作人林二汶同藍奕邦、男子組合C AllStar同新晉唱作人李拾壹Crossover表演；而每次都有嘅「青草地攤」就行懷舊路線，除賣懷舊嘢，仲教整鎢絲花燈。