民主黨擬明年谷月供計劃

【明報專訊】呢兩年接連有區議會同立法會兩場大選舉，政黨都需要籌募經費。民主黨計劃喺明年初大力推動「月供捐款計劃」，希望支持者每月捐款畀民主黨，令該黨有一個比較穩定嘅財政來源。民主黨亦計劃明年2月舉行籌款晚宴，之不過，近日有報道話前黨員狄志遠都打算明年初為新組織舉辦籌款晚宴。兩個籌款晚宴咁近，會唔會對民主黨嘅成績有影響？民主黨司庫袁海文話唔擔心會有影響喎。


「月供計劃」一直都存在，只係過去極少推廣，袁海文話希望喺區議會選舉後，由黨中央開始往外推廣至地區層面。月供金額由100港元開始。袁海文話，目前捐錢畀民主黨嘅都係以中年人為主，相信年輕人未必可以負擔到太多捐款。


冀街坊每月捐100開始

袁海文亦透露，今年多咗唔少「乳鴿」加入咗黨慶籌款委員會，包括副主席羅健熙。羅健熙同Emily講，黨內年輕人接棒唔單止喺黨務上，仲有籌款力量都要接棒幫手。佢希望可以吸收搞籌款活動嘅經驗，學吓點搵捐款者。