維珍妮貼身內衣贈記者

【明報專訊】靜咗一排的新股市場，今日終於有番啲人氣，事關為Victoria's Secret 生產內衣的維珍妮國際（2199），喺噚日招股記者會上，請來一群模特兒向在座記者們展示公司生產的內衣產品。胸圍係維珍妮主要產品，現在一眾模特兒自然會著上胸圍， 走性感catwalk，足足行咗10 分鐘，各式各樣胸圍令人目不暇給，觀眾情緒亦禁不住高漲起來。

咁都未算，維珍妮仲向在場記者每人送上一盒貼身內衣組合禮品包（右圖），入面除咗有胸圍、內褲，仲有同樣係公司出產嘅功能性運動褲一條。最特別嘅係公司一視同仁，無論男記女記，一律收到同一款內衣組合包，唔知男性行家收到會唔會面紅呢？當然佢哋可以轉送身邊嘅女士們，不過唔好話小琴唔提大家，入面啲內衣褲有分size，送禮之前，最好打聽下人哋啱唔啱先，免得大家尷尬就唔好啦。