遮打潮州節 每日送2000瓷杯

【明報專訊】香港潮屬社團總會將會喺10月8日至12日，喺中環遮打花園舉辦「香港潮州節」，設立文化攤位同邀請潮州當地食肆來港參加，展示陶瓷、刺繡同茶道等工藝，亦會有舞蹈、歌唱同潮劇表演，向市民及遊客介紹潮州特色。


總會監事會主席林建岳喺活動發布會上話，活動每日會以先到先得形式，送出2000隻小瓷杯畀入場市民。副民政事務局長許曉暉就話，潮州係嶺南社會文化嘅重鎮，相信「潮州節」可以令市民進一步認識潮州文化，並希望潮學成為「潮流之學」。


胡定旭周秀娜對談

總會話呢次活動用咗大約350萬元籌備，目標係吸引6萬至7萬人次入場，到時許曉暉同籍貫潮州嘅食物及衛生局長高永文，會分別出席「潮州節」嘅座談會同烹飪活動。


另外，兩個潮州人「肥胡」胡定旭，同「女神」周秀娜有對談環節，政協常委屆時同靚女唔知會擦出乜嘢火花呢。