iPhone 6s 今開售有燶味

【明報專訊】果迷等咗咁耐，iPhone 6s同6s plus今日終於開售喇！手機回收價會係大家嘅焦點之一，網上已經瘋傳一系列回收價預測，雖然有人話有玫瑰金色（圖）回收價會較好，仲話第一日一定炒得起，但係都有人話最低只賺得12蚊，嚇到Emily即刻向先達廣場手機店嘅老闆Lo哥劉志剛了解一下。


先達老闆：唔會係唔係都收

Lo哥預計玫瑰金色回收價會比較好，但因為內地都係首發開售地區，所以佢哋要改變策略，唔會好似iPhone 6開賣咁，「係又收，唔係又收」。


Emily知道之前先達有手機店上載大批iPhone 6s嘅相，仲寫住「香港各大行……已經到貨」，仲話呢啲就係叫「後門貨」，好似暗示緊先達個貨源好充足，一炒唔起，實無肉食，嚇得班炒家真係死死吓，好彩間公司後嚟見到啲果迷反應好大，就喺網上澄清，話原來「各大行」唔係指先達手機店。


所以唔好話Emily唔點醒大家，訂咗機或者等攞機嘅果迷或者炒家，自己要睇實個市喇！