張寶華中大講書 教開page鬥多like

【明報專訊】前主播張寶華今個學期會到中文大學新聞及傳播學院做講師，第一日返學就喺facebook同大家分享「為人師表」嘅心情，又話「變幻才是永恆」， 叫大家唔好怕轉變，短短一個post，就有超過800個like。


教打造品牌 評分參考「like」數目

有中大同學話畀Emily聽，張寶華真係新人事新作風，佢所主講嘅課程「How to be a successful opinion leader and brand buliding」（如何成為一個成功的意見領袖和打造品牌），當中有一份佔分30%嘅功課，竟然係要同學喺facebook開個personal page嚟sell自己，等班學生加強自信，仲話「like」嘅數目會係一個評分嘅參考，暫時同學仔多以飲食、旅遊做題材。


同學仲話，張寶華上堂時有引用自己超過4.7萬個「like」嘅facebook page畀同學做參考。有同學畀呢份功課嚇怕而drop科，但係都有同學話張寶華教書幾吸引，睇嚟繼續留低嘅同學真係要加把勁，上堂之餘都要認真經營facebook先得喇！Emily本來想搵張寶華分享下如何爭取「like」嘅貼士，但至截稿前未搵到佢。