湯家驊與青年評論員傾理念

【明報專訊】退出公民黨嘅湯家驊（Ronny）成立咗「民主思路」之後，都有同泛民、建制團體會面，其中由唔同政黨嘅新生代組成嘅青年時事評論員協會，上星期五晚同Ronny食飯，希望了解民主思路嘅理念同方向。今次出席嘅包括民建聯副主席周浩鼎、新民黨中委甘文鋒、自由黨青年團副主席楊浩泉等，Ronny一餐飯就見晒建制政黨代表。


周浩鼎話，湯家驊席間講到，家政治環境充滿口號式政治，sound bite主導，佢希望民主思路可以帶嚟一啲改變。佢又話，雖然席間大家對好似政改等議題觀點唔同，但君子和而不同，呢餐飯大家仍然言談甚歡。


另外，退出咗民主黨嘅黃成智、狄志遠話籌組新平台，佢哋今日會見傳媒，佢哋透露籌組緊嘅政黨會叫「新思維」，講吓佢哋嘅信念，介紹吓黨員咁。不過，佢哋發出嘅採訪邀請係話今日搞「紀者茶會」，連「記者」都寫錯。