田二少扮兔仔冧街坊 陳家洛率家人派燈籠

【明報專訊】政黨中人通常都會趁大時大節，落區同市民接觸，家區議會選舉臨近，有意參選人都更把握機會同選民接觸。好似公民黨陳家洛，前日就喺大學教書放工之後，同太太同仔女喺海怡一個商場門口派燈籠畀街坊，雖然派嗰陣有幾陣雷雨，但無阻佢向居民送上中秋祝福。家洛早前宣布考慮出選海怡東，但喺選區問題上同人民力量主席袁彌明有啲爭拗，似乎要順利解決都唔係咁易。


本身係荃灣區議員嘅新民黨副主席田北辰，就喺前晚迎月夜喺區內舉辦中秋晚會，田二少仲戴埋兔耳仔應節，踎低起身之餘仲大衛高柏飛上身，拎住道具向街坊表演魔術，班街坊無「篤爆」佢嘅表演之餘，仲非常賞面畀掌聲佢，田二少都話要多謝佢哋。


兩個立法會議員瞓身做地區工作，區議會嘅競爭有幾激烈，相信大家都睇得出。