Alexter再現金鐘派傳單 周永康﹕腳踏實地感覺好

【明報專訊】大得仲記唔記得Alex+Lester=Alexter？學聯前秘書長周永康（Alex）同副秘書長岑敖暉（Lester）昔日喺金鐘佔領區係「萬人迷」，每次現身都吸引到好多少女要同佢哋影相；一年過去，兩人噚日現身金鐘佔領運動一周年集會，仍有唔少女士搵佢哋合照。佢哋唔使再喺台上以領袖身分面向人群，反而可以輕鬆地喺台下派傳單，周永康笑言腳踏實地嘅感覺好好。


岑敖暉同周永康喺佔領運動完結後，就投身「社區公民約章運動」，兩人噚日負責喺金鐘街站派傳單。好多人都同二子講聲加油，亦有人繼續話「靠晒你哋」。有唔少中年女士一見到岑敖暉，就心痛咁問，「點解你瘦咗咁多？」岑敖暉同Emily講，家雖然瘦，但瞓得好兼好胃口，健康唔錯。


周永康話好多去集會嘅市民都好樂觀，大家都相信只要人心不死，就可以靠一波又一波嘅抗爭運動爭取民主。