終院搬屋後首審案 黃仁龍讚：夠大，聽嘢清楚

【明報專訊】終審法院最近「搬新屋」，「回歸」返去有超過100年歷史嘅中環昃臣道大樓，噚日第一日開庭審案，審理一宗遺囑釋義嘅終審上訴。興訟雙方包括做過律政司長嘅資深大律師黃仁龍（圖），以及另一名資深大律師馮柏棟。開庭後，馮柏棟首先起身陳辭，佢話呢日係呢棟歷史大樓嘅一個歷史性時刻；之後黃仁龍陳辭，亦都話呢棟大樓係香港法治嘅象徵。Emily散庭之後問過黃仁龍，佢大讚新大樓與以前相比「夠大，聽嘢亦夠清楚」。


張達明讚聲音設計好

旁聽席上，亦見到監警會前主席、資深大律師翟紹唐，同埋港大法律學院首席講師張達明嘅身影。張達明仲帶埋阿仔一齊旁聽，佢話以前舊終審法院聽嘢比較難，家坐喺後排都聽得清楚，大讚新法庭嘅聲音設計做得好。