民建聯倡用天眼捉垃圾蟲

【明報專訊】特區領導成日講民生無小事，建制派第一大黨民建聯，就好賣力幫政府搵「衛生黑點」，佢哋早排話搵到131個衛生黑點，叫政府盡快跟進處理，而經過兩個月，政府就搞咗個大龍鳳「全城清潔2015 ＠家是香港」運動。民建聯噚日就匯報成果，話呢批黑點中有37個（28%）「已清除」，29個（22%）黑點「部分改善 積極跟進」，但話仲有65個（50%）未處理好而列為「未有改善」。


131衛生黑點 稱近三成已清除

民建聯噚日開記者會，話政府做得未夠，所以提出一系列建議，包括建議引入閉路電視系統輔助監察同執法。民記話唔少街頭後巷好污糟，仲話有人投訴，深夜時分成日有人非法棄置大量家居、食肆垃圾或建築廢料於街上，有食肆將垃圾同廚餘棄置後巷。因此，佢哋話如果係呢啲街道裝設閉路電視系統，並安排便衣人員喺黑點突擊執法，咁先至有效。民建聯仲要求掃蕩違例擴展營業範圍嘅食肆與商戶，並繼續打擊小販擺賣，特別要加強打擊深夜及清晨時分嘅非法販賣活動喎。