34℃穿秋裝 葉劉：咁襯色好睇

【明報專訊】區議會選舉聽日（周五）開始接受報名，政黨亦陸續搞誓師大會振士氣，噚日新民黨就喺荃灣一個露天廣場舉行誓師。呢日陽光猛烈、酷熱天氣警告生效，有近34℃，在場參選人、傳媒都呻熱，不過向來著重衣著嘅新民黨主席葉劉淑儀，繼續走在潮流嘅尖端，著晒秋冬裝上身，除咗鮮紅色長袖外套，仲戴埋絲巾（圖），唔知仲以為噚日得十幾度，只見佢同成班熱到身水身汗嘅黨友企埋一齊，可謂相映成趣。


葉太呢身裝束，企喺台上曬足成個鐘，事後Emily問葉太唔熱咩？葉太話梗係熱，但佢話無法啦，咁樣襯色好睇嘛！睇嚟唔少女士都係天生愛靚唔愛命！

新民黨參選人中，噚日以有意競逐連任嘅沙田區議員林松茵較受注目，皆因佢粗身大細，未到佢上台時，都要搵櫈仔坐吓，佢話BB預產期係12月，區選11月底舉行，恐怕佢落區都幾辛苦。Emily相信都無乜候選人會腹大便便咁落區競選，林松茵話希望大家唔介意佢參選係「買一送一」啦。