告別立會 湯家驊梁家傑握手

【明報專訊】退出公民黨並辭去立法會議員職位嘅湯家驊（Ronny），噚日正式告別議會工作。佢同傳媒茶敘時話，自己最後一日心情平和，形容如「放大假」。Ronny早前參加泛民會議時發生小風波，被前黨友梁家傑（傑哥）一度請離會議，並遭拍枱呼喝，唔少人都關注呢兩個戰友嘅關係，噚日Ronny出席立法會會議時，兩人公開握過手，而Ronny就話大家仍係「好朋友」，無咩嫌隙。


湯家驊獲贈余若薇墨寶

雖然如此，Ronny早已與公民黨「貌合神離」，而黨內噚日原來連正式告別會都無搞。Ronny笑言，噚日最後一次喺立法會出席會議，郭榮鏗有同佢影相，傑哥都有主動坐過去打招呼，笑問﹕「我諗呢個都算係farewell咗！」臨別之際，公民黨淨係派咗郭榮鏗做代表，贈予Ronny一幅由主席余若薇題嘅「海內存知己，天涯若比鄰」墨寶。


回望11年立法會議員生涯，Ronny坦言無咩開心嘅事，失敗多於成功，指任內最成功嘅係推動競爭法同說服黨友支持最低工資，仲話最低工資係自己唯一可以扭轉公民黨立場嘅例子，但不幸喺政改上做唔到工作。


佢又感嘆，喺立法會印象最深嘅發言，係2010年政改時，自己第一次公開表達與公民黨政治取向有分歧，如今睇番，都覺得自己當時十分激動。


湯家驊告別議會

code.mingpao.com?1751