升職後首去立會 陳岳鵬唔夠大聲

【明報專訊】噚日立法會政制事務委員會討論檢討選民登記制度，早前升職嘅陳岳鵬（Ronald）就第一次以政制及內地事務局副局長身分出席會議。雖然多數問題都由局長譚志源作答，但Ronald都不乏表演機會，好似喺工黨主席李卓人質問政府時，Ronald思考咗幾秒後，都能夠不徐不疾咁主動回應佢。


會後Ronald無為自己表現評分，但就話一定「唔係百分之百」，仍然有改善空間。佢話自己唔係第一次出席立法會會議，又話之前做政治助理時都有處理有關選舉嘅工作，家首要目標係做好嚟緊兩年嘅各場選舉。


Ronald表現如何？民建聯蔣麗芸形容Ronald表現「啱啱合格」，認為佢斯文淡定，但把聲太細，不過新官上任係會戰戰兢兢，希望佢將來多啲上立法會。