甄子丹「冇學位」「要保密」 宇宙抽水最強

【明報專訊】昂坪360會同電影公司合作，11月26日喺昂坪市集推出「葉問體驗館」，噚日專登請咗「宇宙最強」嘅《葉問》男主角甄子丹撐場，記者追問佢《葉問3》同之前兩套有咩分別，點知佢話「簽訂咗保密協議」，唔可以講太多，叫記者問返身旁嘅電影公司老闆黃百鳴。呢個答案咁「熟口熟面」嘅？似足港大啲校委喎。


甄子丹仲話，電影圈內唔少名人都同佢一樣，冇大學學位，依然可以喺圈內立足，叫對呢行有興趣嘅人繼續努力。嘩！講到咁，真係成個宇宙嘅水都畀佢抽乾。


「葉問體驗館」係旅發局「香港繽紛冬日節」嘅重點宣傳項目之一，展期由2015年11月27日至2016年1月31日，將會展示《葉問3》精選拍攝場景、主要演員戲服等，同埋甄子丹嘅絕密手稿。到時download佢哋個App，用手機對住特定標誌，就可以同演員合照，好似置身《葉問3》電影世界咁。