公民黨區選單張 莫乃光被打格

【明報專訊】公民黨噚日舉行區議會選舉誓師大會，正式宣布派出25人出戰區選。Emily到場後攞起份宣傳單張，發現個封面除咗一眾公民黨成員，仲見到幾個用電腦執朦咗、「被消失」嘅面孔，畀人「馬賽克」咗嘅就包括立法會議員莫乃光（圖中紅箭嘴示）。公民黨話呢張封面相係喺年初民陣遊行時影嘅，由於要符合選舉規定，相入面嘅人要同意佢哋嘅樣貌出現喺公民黨選舉宣傳物上面，但因為部分人聯絡唔上，有啲就未必係公民黨嘅支持者，所以大狀黨以防萬一，將呢批人遮樣。


身為港大校友嘅公民黨主席余若薇同Emily講，雖然話區選民生議題唔能夠忽視，但以近期港大副校長任命風波為例，政治其實存在喺社會每一個角落，所以區選都迴避唔到政治。佢相信政改表決後雖然有部分人會對政治覺討厭，但同時亦會有一班人嘅投票意欲會變得更強。