新聞類別
財經
詳情#
【明報專訊】阿里巴巴主席馬雲一向多搞作，由最初嘅英文老師，到中國互聯網巨頭，仲做埋中國首富，不過，最近又有咗另一個新身分——畫家。
無錯，小琴昨喺蘇富比2015年秋季拍賣會現場就發現咗一幅好似地球嘅畫作，看真啲發現作者之一竟然就係呢位互聯網大佬，而另一名作者來頭也不小，就係中國當代最出名嘅畫家之一曾梵志。
伙曾梵志畫地球 倡環保
相信大家都同小琴一樣有疑問：「What？馬雲竟然畫畫？」蘇富比應該一早就料到會有咁嘅疑問，專登喺會場用個Mon播放馬雲揮筆畫畫嘅英姿，加上佢嘅招牌皺眉樣，畀人感覺都好認真。
點解馬雲無啦啦去畫畫，莫非真係有「藝術家嘅一團火」？ 導賞員就介紹話，呢幅畫係馬生為佢有份嘅「桃花源生態保護基金會」籌款而作，估值大概150萬到250萬港元，將全部捐出，希望喚醒世人珍惜環境，保護自然。翻查資料，原來另一名中國「科網大亨」騰訊控股（0700）主席馬化騰都有份創建呢個基金會，唔知佢會唔會都學馬雲，搵個出名藝術家一起「創作」幅油畫呢？
email: [email protected]
[小琴密語]
留言 (0)
