渣馬10公里賽報名 兩小時爆滿 網民嘆：難過買iPhone

【明報專訊】「報渣馬難過買iPhone！」一年一度嘅渣打馬拉松繼早前開始接受報名，全馬同半馬組別相繼額滿後，一向最受歡迎嘅10公里賽事噚日朝早7點開始接受報名，兩個鐘就爆咗，好多網民都喺討論區大呻「報唔到」。


2016年渣馬賽事喺出年1月17日舉行，10公里賽事噚日朝早7點開始接受報名，香港業餘田徑總會朝早9點就宣布，3.5萬個名額已經爆滿。


網站開始接受報名時，當太多人同時進入報名系統，會被轉入排隊頁面，有網民話自己7點10分登入網頁，已經見到排隊人數超過3.5萬人，好無奈咁話「報足3年都報唔到」。


另外，好多人大呻畀個系統「玩死」，排足45分鐘後又彈返首頁，又要重新排過，有網民仲話報渣馬「仲煩過玩iReserve（預購蘋果產品嘅系統）」。


Emily望吓渣馬Facebook專頁，都見到唔少跑步愛好者留言投訴，話每年都有人報咗名又唔跑，對真正熱愛跑步又報唔到名嘅人唔公平，認為應該畀上年限時內完成到賽事嘅選手優先報名。