梁繼昌：UGL事件未解決

【明報專訊】立法會喺悠長暑假後，本周中復會，會計界議員梁繼昌（Kenneth）就話，啱啱完成2014/15年度嘅工作報告。Kenneth回顧過去一年工作重點，第一項係話自己捍衛普選原則否決咗政改方案；第二項大事就同廉潔有關，係佢質詢特首梁振英（CY）收取澳洲UGL公司5000萬元款項事件。Kenneth話，喺佢眼中UGL事件仍未解決，佢依然有追香港稅局及英國稅務當局，睇吓梁振英收取款項後有無交足稅喎。


Kenneth上周喺facebook上載咗張大提琴相片，仲話諗住響應網民號召，同埋囝囝一齊去港鐵抗議，但最終無現身。佢話當日港鐵有職員打電話畀佢問佢係咪嚟真，但係Kenneth話唔去抗議與港鐵游說無關，而係因為囝囝話知道今次活動混雜咗其他人參與，所以唔想去。