傅育寧狠批宋林 「不忠不誠不義不情」

【明報專訊】擾攘年幾嘅華潤前董事長宋林涉貪案，響上個月終於有官方定論，而響中紀委通報宋林已移送司法機關處理之後，華潤集團隨即開內部大會，接替宋林做董事長嘅「救火隊長」傅育寧仲響大會上罕有致辭狠批，形容宋林所作所為「於國不忠、於企不誠、於人不義、於家不情」。


內部大會痛斥 上載官網公開

自從傅育寧臨危受命之後，一直好少向外界談論宋林，而雖然今次佢只係響內部大會痛斥，但集團就將內容放上官網，變相對外公開。


除咗痛批宋林，傅育寧仲提及佢下一步救火大計，首先響用人方面唔需要再受掣肘，暗示華潤內部「該抓的已抓了」，唔會再有人出事；其次係重塑企業文化，強調奉公守法，誠實守信，明顯係要重建華潤形象；最後就係業務調整，包括最近嘅華創（0291）業務重組等。


[小琴密語]