總商會請咗個「男神」經濟師

【明報專訊】近期都有唔少社會議題涉及商界及勞工界，好似檢討強積金對冲、標準工時，甚至年底生效嘅競爭法等。香港總商會總裁袁莎妮（Shirley）都話未來有唔少辣手議題要處理，而商會近期都搵到個年輕力壯嘅人幫手，就係獲聘為該會高級經濟師嘅董一岳（Rocky）。Shirley噚日介紹Rocky畀記者認識，有人讚Rocky官仔骨骨，笑佢係總商會「男神」，而Shirley就講笑話，請Rocky入商會，除咗薪酬待遇，佢都要出賣自己嘅魅力去游說喎！


Rocky話自己係華仁仔，之後去美國讀書及工作，其後返香港做過商業機構及智庫，都係做經濟分析，對住一堆數字。有女記者追問Rocky年齡，但返咗工唔夠一個月嘅佢有啲怕醜，只肯話「30幾啦」，而有啲估唔到嘅係佢已經結咗婚，仲有兩個小朋友。