政府甩轆 誤寫「檢控前特首CY Leung」

【明報專訊】特首梁振英（CY）前日喺行政會議前見記者，回應前特首曾蔭權被律政司檢控一事。政府新聞處官方twitter帳戶一度英文發帖，出咗律政司檢控「former Chief Executive CY Leung」嘅文字，即係CY變咗前任特首！ 眼利嘅英國駐港澳總領事吳若蘭轉發呢個帖文，質疑係咪打錯字。


網民話打定新聞稿「留第日用」

呢個錯誤都惹來唔少網民議論，有唔少人話笑咗。政府新聞網噚日傍晚喺facebook以「我們不是預言家」回應事件，話搞錯特首人名係twitter自動校正設定嘅問題，已經取消有關設定，避免同樣情况再次發生。


吳若蘭轉發錯誤twitter發文後，有網民留言，話呢個係一個預言，又話帖文可能係正確嘅，只係提早咗兩年出現（It may be right. The message just posted 2 years early）。喺政府新聞網嘅留言較一面倒，有網民話「嘻嘻，個笑話又幾好笑喎」、「冇錯呀！！只係打定新聞稿，留第日用」。