潮州節開幕 架己冷開腔撐誠哥

【明報專訊】內地官媒早前聲討富商李嘉誠「撤資」，搞到誠哥親自發聲明反駁。一班同鄉為誠哥抱不平，噚日香港潮州商會就登廣告力撐呢個「架己冷」，對誠哥愛國愛港情操充滿信心，又話誠哥喺改革開放之初就義不容辭投資內地。


香港潮屬社團總會搞嘅「香港潮州節」噚日喺中環遮打花園開幕，雲集政商界「潮人」。講起誠哥單嘢，唔少潮商都有啲㷫烚烚，潮屬社團總會秘書長方平話，佢哋登廣告唔係要同官媒對着幹，不過傳媒報道實在有欠公允。誠哥作為潮商嘅榜樣，又係總會嘅首席榮譽會長，所以會董一開會傾登廣告，大家都好支持。潮州商會副會長林宣亮話，今次挺身而出，只係希望幫誠哥講番幾句公道話。


潮州節內有幾十個攤位，當中包括介紹潮州小食，林宣亮同Emily講，小食係經佢哋精挑細選，一行20幾人組團去潮州試食，務求揀到最具特色又好味嘅小食同大家分享，好似鴨母捻、烏欖等，特別係後生一輩都唔了解潮州，希望以特色小食令後生仔認識多啲，老一輩又可懷緬吓。


下月英國文化節 或見御林軍

潮州節後，11月將有首個大型英國文化節，Emily聽聞遮打花園會華麗變身為英倫大街，幸運嘅話，大家更會喺大街小巷發現御林軍嘅影蹤。