星光大道網頁改版 懷緬味濃

【明報專訊】尖沙嘴海濱優化計劃做緊公眾諮詢，但星光大道前日就先封閉展開工程，為期3年，今個月內會搬走李小龍、麥兜等銅像，下個月15號就重新喺尖沙嘴東海濱平台花園嘅「星光花園」展出。Emily噚日發現，用咗超過10年嘅星光大道網頁突然改咗版面，由原本以文字為主、藍色為主調嘅介面，搖身一變用咗淡黃色做底色。Emily聽聞，因為新世界要更新工程期間嘅資料，於是索性連版面都改埋。


新網頁亦介紹增設嘅「星光花園」同「星光影廊」，前者除展出銅像，亦邀請本地插畫師畫電影場景壁畫，例如耳熟能詳嘅電影《新不了情》主角劉青雲同袁詠儀，後者就有唔同年代嘅電影海報。新網頁仲展出唔少當年星光大道開幕嘅相，又簡介百年電影史。唔知係唔係關咗星光大道，都可以畀公眾喺網上懷緬一下。