高永文莊陳有環島跑「跑多咗」

【明報專訊】噚日朝天氣轉涼又落住雨，但阻唔到一班跑手嘅熱情。香港失明人協進會與非牟利組織「跑去你屋企」，主辦「跑去環島手拖手」活動，有34對健視及視障跑手二人一組，以接力形式環繞香港島完成50公里跑嘅壯舉，目標係為香港失明人協進會籌募100萬元經費。


電動車太靜 憂失明者唔為意

食物及衛生局長高永文噚日同失明人協進會主席莊陳有，以傷健二人組拍檔主持開步禮，本來大會只安排二人作狀跑20米就收工，但兩人不自覺咁跟大隊跑咗近100米，要工作人員追去捉番佢哋返嚟。


今次有來自27間企業嘅高層同員工，共34對健視同視障跑手，由中山紀念公園出發，以接力形式環繞港島跑50公里，而養和醫院今年仲派出4名眼科醫生參與活動，同視障人士一齊上路。


莊陳有話10月15日係「國際白杖日」，目的係喚起大眾關注視障者嘅需要，佢又話隨着電動車喺香港愈趨普及，佢哋關注電動車行駛時太靜，會對盲人構成潛在危機，而世界盲人聯會曾經向聯合國建議電動車加入一定嘅聲響，司機不能自行關掉，以便盲人可以聽到路上有車。