工程師唐仕恒 理大新副校 無博士學位

【明報專訊】港大校委會早前否決任命陳文敏做副校長，引來滿城風雨，而校委被指否決理由之一係陳文敏「無博士學位」。無獨有偶，理工大學噚日公布新任副校長（校園發展及設施管理）嘅任命，呢個職位就由無博士學位、註冊結構工程師唐仕恒出任，唐會負責校園發展及設施管理，任期由11月27號起生效。


Emily問過理大，博士學位係咪選副校長標準之一？理大發言人話，其實副校長都有唔同分工，負責學術領域嘅副校長全部都有博士學位，但校園發展及設施管理側重豐富經驗，所以唐先生完全符合要求。


任職港鐵23年

理大話，唐仕恒喺結構工程及物業發展方面有豐富經驗，先後於英國、香港及加拿大從事工程工作，領導跨界別專業團隊方面經驗豐富。


唐副校之前任職港鐵公司23年，其間協助策劃項目包括將軍澳「日出康城」等大型發展計劃。


校長唐偉章亦盛讚唐仕恒，話佢係帶領校園發展及設施管理團隊最適合嘅人選。