新聞類別
副刊
詳情#
【明報專訊】好嘅教育可以改變人嘅一生，所以Happy Mama一向都好尊重教育工作者，尤其係作為領導者嘅校長；但原來呢個本應受人景仰嘅位置，到今日竟然冇乜人想做！
上星期有報道話，調查顯示47%小學校長因工作壓力大及健康問題，打算提早退休，但56%副校長及67%資深主任都無興趣升任校長，主因是職責太重，同埋覺得個人性格不合，當校長退休潮來臨之時，恐怕會出現斷層情况。資助小學校長會名譽主席梁兆棠，喺報道中講咗好多校長面對嘅壓力，例如教師壓力太大，喺課堂失控罵學生，仲有家長投訴等情况，好多時都要校長出面「解畫」，相當費神。
行政為主 遠離教學初衷
Mama亦搵咗大埔舊墟公立學校（寶湖道）徐俊祥校長傾過，徐校長喺唔同學校任職校長共20年，亦有為校長培訓課程做導師嘅經驗，對於上述調查結果，一啲都唔驚訝﹕「有唔少上校長培訓班嘅人，其實都無意升任校長，只係嚟上吓」。
佢話，入得教書呢行，好多都有一股熱誠想培育學生，但老師升做主任後，多咗行政工作，而副校嘅教務同行政工作比例各佔一半，升到做校長，基本上都係做行政工作為主，「直接對學生嘅時間少咗，好似離初衷愈來愈遠」；加上責任大，又要處理好多教育任務及政策，佢亦理解未必人人想做呢份咁艱難嘅工。
宜平衡校長工作生態
要改善校長嘅工作生態，佢認為校長唔應該只做行政工作，同時亦應帶領課程發展，兩者要攞一個平衡，從而得到滿足感，「唔使好似做PR咁」。
而校長亦應建立領導才能，識得將權力下放，將行政工作好好分配畀各教職員；不過，佢話本地教師嘅課擔好重，難以做到以上分工。所以要解決現况，非三言兩語可以說得清。
雖然校長唔易做，但徐校長就話自己抱住樂觀嘅心態，做得好開心。佢話，校長嘅角色好重要，希望現况有所改善，令多啲有心人夠膽坐上呢個位。
留言 (0)
