特首財爺4局長各自出埠 高官齊齊暫離「熱廚房」

【明報專訊】金鐘「門常開」噚日朝早照有行政會議開會，但就由署理特首林鄭月娥主持，出席官員同議員都少咗，皆因喺呢段期間高官驛馬星動，除咗特首梁振英（CY）之外，呢幾日同時有至少5名司局長身在外地訪問，遠離「熱廚房」。


16年來再有特首訪以色列

CY已經去咗以色列，噚日同以色列總統瑞夫林（Reuven Rivlin）會面，傾吓雙邊經貿關係，行政長官創新及科技顧問兼行會成員楊偉雄都陪埋CY去考察。以色列駐港總領事館就話，今次係16年來再有香港特首到當地官式訪問。CY之後會去英國，17號返港。


曾俊華﹕重返紐約好高興

財爺曾俊華日前去秘魯出席國際貨幣基金組織會議後，噚日轉到紐約，行程包括參觀當地華人博物館。佢發言時仲講笑話佢近日遠離咗中環「熱廚房」，好高興返回年輕時生活過嘅紐約市。佢外遊已結束，預計今晨返抵香港。


其他身在外地嘅局長，包括常忙於外訪嘅教育局長吳克儉，佢去咗新加坡出席國際教育會議，仲會同新加坡政府新內閣部分官員會面。商務及經濟發展局長蘇錦樑就去咗比利時，目的係促進香港同歐盟及比利時嘅聯繫。佢哋兩個都會喺15號返港。


至於政制及內地事務局長譚志源，日前已率領特區政府代表團出訪北京和西安，係特區政府與外交部嘅年度互訪，佢會喺16日傍晚回港。


環境局長黃錦星就去咗菲律賓宿霧出席亞太經合組織能源部長會議，今日返港。食物及衛生局長高永文就接力，聽日啟程去倫敦訪問兩日。