傳轉戰直選 林大輝﹕有緣不抗拒

【明報專訊】循廠商會界別晉身立法會嘅議員林大輝（大輝），盛傳佢有意轉戰直選，向來鍾意講吓佛偈、有大師之稱嘅大輝噚日同傳媒聚會，講到仲係咪會繼續從政，佢直言政改方案被否決後，自己都有啲盤算，但覺得從政都要睇緣分，形容「有緣不抗拒、無緣不強求」喎，唔知讀者又理唔理解到大師呢句說話呢？

大輝話區選都要忙於為朋友撐場、拉吓票，仲透露有個名單，都係愛國愛港陣營嘅，當中有人係新參選，亦有人係連任，有20幾人咁多，而佢落區時都有唔少街坊問佢﹕「你選新東定新西呀？」街坊表明支持佢，但大輝就強調唔能夠以此作準，「唔通佢哋會當面話，我唔支持你呀，你千祈唔好選呀」咁咩。


噚日佢畀記者影相時，更加擺出唔同姿勢，為自己一旦參選任何一區直選影定宣傳相咁，佢蹺住雙手咁話呢張係新界東，代表胸有成竹；九龍西呢就垂低雙手，話係「垂手可得（其實應係「『唾』手可得」呀）」。