九巴美容海報籲讓座 市民睇唔明

【明報專訊】九巴海報中有個女人問人「做完美容後生晒，坐巴士仲有無人讓座畀我」，專研究靈異嘢嘅雲海噚日喺facebook貼出呢張海報（圖），話前日喺尚德邨巴士站見到，反問到底九巴宣傳緊乜？有九巴乘客直接批評「九唔搭八」。


呢張相截至噚晚吸引咗700幾個like，有人留言解畫﹕「即係話無人讓座比（畀）你，你唔駛嬲，因為你個樣生得後生，係咪即刻開心返晒呢！」另有人問係咪唔好讓座呢？人哋個樣殘唔代表人哋老。


九巴噚日回應，話張海報係配合舊年11月「長者日」宣傳活動而設計，以「關愛•美麗」為宣傳口號，呼籲乘客多關懷長者。九巴仲話，嗰個活動安排咗長者義工喺巴士總站張貼海報，宣傳關愛讓座嘅信息。不過，似乎乘客唔係好get到九巴嘅好意，有九巴乘客喺雲海個facebook留言，話見到呢張嘢好耐，但一直諗唔明佢講乜嘢，批評海報「九唔搭八」。


（雲海facebook圖片）