誰還要做報業大亨

【明報專訊】執筆之時，收到朋友傳來短訊，東方報業（0018）發通告，公布正在洽談出售集團其中一份刊物，頓時精神為之一振。今時今日，還有生意佬願意真金白銀買紙媒做「報業大亨」？的確係奇聞。


當前網媒並起，紙媒前途被看淡，卻反而傳出有「勇士」願意出錢，呢位「勇士」究竟計條乜數？目的為何？

真係夠晒耐人尋味。不過，從報業老闆角度，在此紙媒命運關口賣產，若價錢合理，實在值得諗諗，看看公司最近股價變動，就足以反映投資者態度。


紙媒影響力 市場價值所在

雖說社交媒體影響力已超前傳統新聞，但到底傳統新聞機構仍然是主要的內容生產者，無論是政治抑或其他方面的影響力，還是不可能被新媒體取代，這亦令傳統新聞機構的商業模式即使過時，憑藉它的影響力，還是保留一定的市場價值，而這個價值在敏感的政治周期（例如選舉年），當然亦會相對高。


梁特以色列「讚賞」誠哥投資

筆者過去就曾經聽過一個故事﹕話說某名政客長期被某報章狙擊，事無大小一律鋪天蓋地唱衰抹黑，政客即使嘗試和解亦無從，無計可施下唯有求援，最後終於得到有實力人士支持，後者願意出錢「買咗份報紙」，政客亦派出身邊人與報業主講數，但最後買方即使提出難以抗拒的條件，還是被賣方一口拒絕，對政客的狙擊亦變本加厲。跟筆者講這個故事的朋友就說：「如果當年成交了，後來香港的很多事就不會發生了。」


「超人」李嘉誠近年投資以色列，特別是科技公司，據說唔少大陸創投基金都跟隨超人腳步。


「超然」的梁特，最近都帶隊去以色列訪問，向當地政商界介紹香港，話香港公司已經打入該國市場，好似一間本地創投基金Horizons Venture，就喺當地投資咗超過20間公司，證明香港好有能力為以國企業扮演籌資角色云云。呢間Horizons Venture，其實就係誠哥私人擁有嘅「維港投資」，部分內地媒體近日圍攻誠哥，梁特竟然會將誠哥公司當做典範，並不似梁特風格，筆者唯有推論，梁特讀佢篇偉大講辭時，可能根本就唔知道維港投資其實係誠哥嘅Baby。


[應正亮 廿四味]