三雄逐鹿灣仔樂活 選美佳麗紛紛戰區選

【明報專訊】唔少政黨都力推靚女政治新星參選區議會，可謂「小花」處處。不過，要講真正靚女，就至少有3個係選美出身嘅參選人，包括參選南區香港仔選區嘅「哈佛小甜甜」任葆琳、南區海怡西區嘅人民力量主席袁彌明，同埋葵青青衣邨區嘅「中國小姐」趙哲妤。選美出身會唔會特別有着數？趙哲妤叫大家唔好諗多，選美對參選無咩直接幫助，又話「選美同區選大有唔同，選美講樣講身材就夠，但區選就要有心有力有實幹」。


趙哲妤：選美講樣 區選要實幹

任葆琳話要遵守選舉條例，所以唔可以接受訪問。袁彌明話，其實選美出身係好小優勢，因為區議會都係視乎參選人嘅地區工作。知名度用喺立法會選舉會比較有效。


除咗選美，Emily想同大家介紹部分「有睇頭」選區，包括灣仔樂活，因為除咗有2007年曾經參加港島立法會補選、表演「飯碗舞」一鳴驚人嘅蕭思江，仲有社民連麥國風，同「代妻出征」嘅「法律超人」謝偉俊。


年逾70歲的灣仔樂活現任議員白韻琹因為「腳痛」，今屆唔會競逐連任，改由丈夫立法會議員謝偉俊「代妻出征」。白姐姐有百分百信心謝偉俊會當選，謝偉俊都話之前同白姐姐落區時，已經認識街坊。


蕭思江亦話肯定有信心，但唔會有太突圍而出嘅宣傳策略，賣點就係為居民服務。麥國風就話，雖然對手用社民連拉布去攻擊佢，但佢一於少理，因為拉布係為咗公義，相信市民眼睛雪亮。


另一個有睇頭嘅選區一定係九龍城土瓜灣北，因為當區有被稱為「奇女子」、提倡「包二奶刑事化」嘅林依麗參選，同民建聯主席李慧琼對撼。同區仲有獨立嘅沈泰鋒。


早前表明有意參選區議會油尖旺櫻桃選區、主打城邦論嘅中出羊子，最終亦取得足夠提名參選。佢喺facebook表示，收到「神秘熱心國民」送上有效提名表，佢申報自己政治聯繫係「香港城邦皇室」，又話自己職業係社交（網絡）紅人。同區亦有獨立人士鍾澤暉同民主黨林浩揚參選。