中大建築學院設計 473竹枝搭弧形竹亭

【明報專訊】講起竹棚，就會聯想起盂蘭節嘅粵曲大戲棚，但原來呢種傳統中國手藝搭出來嘅竹棚都可以好摩登。由建造業議會同政府合作興建嘅零碳天地，裏面一座佔地約350平方米嘅「竹亭」噚日正式對外開放，呢座弧形竹亭由中大建築學院設計，用咗473條竹枝加金屬線，以傳統廣東紮棚工藝搭成，再用半透明防水彈力布網蓋住，可容納200個座位，貫徹低碳建築原則。


噚日亦係建造業議會首屆零碳建築會議，當中嘅午餐會議就喺竹亭舉行，發展局長陳茂波率先參觀咗竹亭，喺午餐會議上主講，佢話政府早排訂出節能藍圖，目標2025年能源強度減四成，而繼啟德發展區使用區域供冷系統，佢話2023年會有第一批居民搬入去嘅東涌新市鎮擴展計劃同埋洪水橋新發展區，都會用區域供冷系統，希望提高能源效益。