被問和尚尼姑假結婚 寶蓮寺首座﹕一答就有煩惱

【明報專訊】噚日寶蓮寺首座和尚釋健釗法師開記者會講「佛你跑」（跑步籌款活動），咁呢排和尚、尼姑涉假結婚話題咁hit，當然又要講吓啦。點知法師妙語連珠，話呢個係一個煩惱嘅問題，因為如果答呢個問題，可能講錯嘢，招惹是是非非，「呢啲就係煩惱嘅來源」，仲話出家人要盡量避免煩惱嘅嘢發生喎。


Emily就問法師，家煩惱唔出現都出現咗，咁寶蓮寺會點解決個煩惱呢？法師就話，家「人都走咗」，在寶蓮寺嚟講係無煩惱，反而「一答咗就有煩惱」，所以「家咪唔答你囉」。


Emliy同一班行家報新聞要講求準確，就想問清楚法師講嘅「走咗」嘅人係邊個，法師就唔肯再答。Emily唯有同法師講，咁樣我哋好煩惱㗎喎，希望法師幫幫手，點知法師嘅回答仲精彩，佢話﹕「你有煩惱唔代表我有煩惱，但我有煩惱就真正係我嘅煩惱，所以你話我會選擇邊樣？」


問完一輪，想要嘅答案仲未搵到，但係Emily似乎真係明白多咗，乜嘢叫做煩惱。