泛民讚陳健波主持財會表現

【明報專訊】財委會噚日繼續審議創新及科技局撥款申請，新一年度主席陳健波喺開會之前，先伸出友誼之手同泛民會議見面，見面之時，泛民政黨邀請佢加入WhatsApp群組討論財會事務，陳健波即刻應承會加入，仲講笑咁話，希望信息內容唔會外泄。


應邀入泛民WhatsApp群組

財會上年度討論撥款劍拔弩張，噚日喺陳健波主持下暫時未再出現，連建制派班長民建聯葉國謙都形容氣氛良好。會議上泛民議員對陳健波嘅讚賞此起彼落，公民黨梁家傑話陳健波主持會議表現公道，唔少泛民議員都話陳健波畀到議員充足時間表達意見之餘，又會令到官員回應時講得具體啲。


會議裏面有建制派議員批評資訊科技界嘅莫乃光「惺惺作態」，陳健波都友善提醒議員，會議係討論撥款，唔係政黨之間互相批評。睇嚟，創科局撥款表決都唔再係遙不可及。