區選「埋門」有競爭 鄧家彪為選舉唔划艇過大海

【明報專訊】一班中文大學划艇隊前隊員噚日完成創舉，扒艇來回香港及澳門，而工聯會鄧家彪（圖）都有到場做後勤。阿彪同Emily講，佢當年係中大划艇隊隊長，今次一心以為可以參與壯舉，可惜埋門一腳，區議會選舉有人報名同佢競爭，咁佢無理由喺區選期間「過大海」玩划艇㗎，所以無奈地放棄咗今次機會。


阿彪競逐離島區議會逸東邨北議席，上周四報名期最後一日，有位叫梁漢威嘅演藝工作者報名。阿彪話佢近期都有操過幾課，一心諗住如果好彩，區選無人競爭，佢就參加扒艇。


曾任中大划艇隊長 盼明年再辦

無得落水，阿彪只好留港做後勤支援，包括籌款、聯絡等工作。Emily有眼不識泰山，開頭問阿彪點解對呢項活動咁積極，阿彪好激動咁話，「吓，我做過中大划艇隊隊長㗎！」佢話自己喺1999年及2000年參加划艇隊，仲贏過聯校比賽冠軍喎。佢話當時練艇好辛苦，5月至9月備戰期間，每星期訓練6日，每日練5個小時。Emily好奇問，印象中嘅划艇隊隊員，個個都似筋肉人，胸肌迫爆tee，但家阿彪嘅身形好似圓咗少少囉。阿彪就話，等佢第日練番一身肌肉畀大家睇吓。


阿彪希望明年同樣時間再辦划艇過大海活動，但佢明年都應該要參加立法會選舉，咁點參加？佢話立法會選舉係9月搞，如果選唔到，佢大把時間玩，如果選到，就可以划艇當慶祝喎。