新聞類別
副刊
詳情#
【明報專訊】狗狗巴士返嚟喇！喺香港，除咗導盲犬，幾乎所有寵物都唔上得公共交通工具。專門接載寵物及主人嘅狗巴士「99BUS」，之前因收費問題被迫停駛，經負責人向運輸署爭取後，噚日終於復辦。巴士上「狗聲狗氣」好熱鬧，唔少狗狗玩得太開心，回程時攰到「死狗」咁！
99BUS噚日帶狗狗去元朗下白泥玩，乘客可以喺太子、美孚等地方上車，來回每人盛惠99蚊，如果帶大狗就要另外買多個位。Emily見到，「乘客」由細細隻芝娃娃到大型嘅雪橇狗都排排坐，27隻狗狗一齊搭車，都咪話唔壯觀！
狗主Fiona就大嘆喺香港養寵物咩車都唔搭得，以前唯有同朋友夾錢租貨van帶隻狗出街，但一程已經要150蚊。另一狗主黃小姐話試過想帶隻狗去探父母，但因為巴士拒載，唯有搭的士，仲要撞正個唔識路又兜路嘅司機，由旺角入天水圍使咗200幾蚊。
99元一位 創辦人話收成本價
創辦人杜淦煒話，3年前有感「點解帶隻狗出街都咁辛苦」，所以成立咗99BUS，幾年嚟先後因為牌照同收費問題觸犯條例，又要搵巴士又要搞文件，過程「都幾煎熬」。
杜淦煒話只係收回成本價，唔係志在賺錢，但噚日見到99BUS終於重開，又撞番啲狗主朋友，佢梗係全車最開心嗰個啦。
狗巴士復辦
code.mingpao.com?1794
留言 (0)
