超盈﹕險被綁架係謠言 四太指有方法保護仔女

【明報專訊】有報道指賭王何鴻燊與四太梁安琪的女兒何超盈接受訪問時透露，數年前曾險被綁架，她指當時有個名單說她是綁匪下一個目標，有人致電問四太她在那裏，正好她在家睡覺沒出街才避過一劫。因此現在她身邊有好多人（保鑣）保護，連司機都是保鑣。就此事問超盈，她解釋道﹕「係一個謠言，係媽咪聽到朋友話搵唔到我，擔心我安全。其實澳門治安都好好，屋企人為安全起見，澳門出入都會有保鑣照顧，買個安心，爹哋、媽咪喺澳門出入都有保鑣。」


超盈否認有4億身家

報道中又指26歲的她現在有4億身家，3歲時收到父親送的第一層樓，多年來還有很多大禮，包括鑽石及首飾。對此超盈笑言﹕「我從來無喺訪問提過任何數字，我都唔知我有4億身家，爹哋個個仔女都惜，都會送禮物，我都無特別計住有幾多錢。我仲細，好多嘢都係屋企畀我，我又啱啱起步幫屋企做嘢，點會講有幾多錢身家？爹哋送物業都係畀我哋用嚟投資。」


四太梁安琪被問到超盈險被綁架一事？她說﹕「好多年前，我們一家出外旅行，有澳門朋友收風，傳有匪徒想綁架，話對象係超盈。當時我聽到即說﹕『嘩！唔係啩！』原來喺我哋去旅行時，朋友找不到我，見我哋無聯絡就好擔心。我一落機就收到朋友電話通知，而超盈當時已返屋企瞓覺休息，佢嘅朋友找不到她咪以為有事囉！」四太續道﹕「所以我哋有自己方法保護仔女，就算去到外地讀書，都會保護到。家超盈明白點解咁多人跟住佢就好囉！」


文﹕娛樂組