單車小店順風車駛到終站 Keith媽媽感謝網民代清貨

【明報專訊】元朗單車小店「順風車」嘅店主Keith（圓圖）早前去內地辦貨時不幸離世，佢父母因為唔識得經營單車生意，小店需要清貨結業；消息公開後，網民一呼百應，大批單車友到場購物，證明人間有情。一星期之後，「順風車」嘅貨品幾乎賣晒，下星期就會駛到終站，舖位交番畀業主，Keith嘅媽媽伍太話心情已經平復好多，感謝一眾車友嘅幫忙。


Emily噚日再去探訪兩老，「順風車」店外貼咗「外出辦事，休息一天」告示，但碰啱Keith嘅父母下晝到店舖收拾，閘門半掩，店內只剩番三個車架同兩盒工具箱，其他貨都畀車友買走。伍太話心情平復咗好多，「希望佢（Keith）喺第二個世界開心 」。Keith喺內地過身，伍氏夫婦仍要兩地奔波處理至親死亡證事宜。


仍需兩地奔波處理死亡證

散貨消息喺網上廣傳後，噚日仍然有幾個車友特登去單車店，睇吓仲有乜嘢可以買。家「順風車」facebook由Keith生前嘅車友管理，不時會更新店內貨品同營業時間，免車友「摸門釘」。


之前有網民唔信Keith離世，網上傳出係趁機散貨還債。伍太聽到呢啲流言都有啲激動，佢話若囝囝未死， 「何必要搞成咁，清埋啲貨都補償唔到」，又話做父母睇到有人中傷個仔都好無奈。


好友幫Keith畫咗一張漫畫，上載到佢嘅個人facebook，只見Keith踩住單車揮手告別，好友都希望佢一路走好。