13次坐監 吸毒者覺悟變社企主管

【明報專訊】原來香港家有500幾間社企，香港社會企業總會噚日頒發「香港社企優秀員工」，有獲獎嘅更生人士，出獄戒毒後成為社企工場主管，希望話畀誤入歧途嘅人知，「只要你有決心，一定可以重頭再嚟」。


獲嘉獎嘅梁雲峰39歲，坐過13次監，家係戒毒中心「方舟行動」旗下社企「新生中央洗碗服務」嘅工場主管。佢20歲起吸毒，其後10年不停進出監獄，直至30歲喺監獄聽到牧師講道後覺醒，出獄後決心戒毒。


戒毒後阿峰留喺戒毒中心做輔導員，之後成為社監。一年前佢同「方舟行動」一齊創立咗「新生中央洗碗服務」，家有14個員工包括釋囚同戒毒者，「眼見好多學員明明喺戒毒村好哋哋，但出到去行番轉頭」。佢哋發現唔少戒毒或者更生人士因為抵受唔到社會同工作壓力，而走回頭路，所以設立「新生」，希望幫佢哋適應重投社會。


咁點解佢哋要揀做洗碗公司呢？阿峰話因為一來見到有商機，二來如果員工連洗碗呢種「厭惡工作」都做到，出到社會對唔同工作嘅接受程度都高啲！社企總會亦有推行「社企認證」，等我哋知道邊間係優質社企，家就有51間社企已獲得認證。