教院現「公平黨」招黨員海報

【明報專訊】教育學院校園早前出現一張聲稱屬於「公平黨」嘅「招募骨幹黨員」海報，引起唔少人好奇，Emily於是打海報上嘅電話號碼，由一個講普通話、自稱陳生嘅男士接聽。陳先生話自己喺內地來港無耐，住喺九龍塘，從事過科研工作，但家無業。佢話「公平黨」目前得佢一個人。


全「黨」得一人稱純粹自發

陳生話自己唔係共產黨員，但有上過黨課，又話如果一個黨嘅宗旨係好，都唔能夠否認佢嘅存在。佢話「公平黨」家得佢一個人，仍然招募緊成員，自己無參選區議會，因為「有興趣、無條件」。佢話成立政黨係個人意願，無受他人指使，資金來源全部嚟自自己，但就有同內地企業「打交道」，形容係正常事。


海報上提到「以合法的管道參與社會政治活動」，陳生就話欣賞佔領運動嘅訴求，但就「不推崇」運動對社會造成嘅衝擊，話「公平黨」係走合法道路。


點解揀喺教院貼呢？佢話試過喺其他院校貼，但好快被撕走，又認為教院學生好似內地師範學院嘅學生一樣，思考能力高喎。


至於未來計劃，陳生話自己只係喺香港「在合法環境」下推廣咗幾日，所以暫時未有咁話。