禁象牙記招 葛珮帆請李冰冰做嘉賓

【明報專訊】民建聯立法會議員葛珮帆（EQ）一直關注保育瀕危大象同禁止象牙買賣嘅問題，嚟緊仲會同內地四大花旦之一嘅李冰冰（圖）一齊保育大象，皆因保育大象團體「野生救援 （WildAid）」聽日將會召開記者會，促請政府盡快立法禁止象牙貿易。估唔到EQ連李冰冰都請得到，佢話李冰冰同自己分別都喺其工作崗位推動保育運動，今次係第一次見面。


稱去年活動擦身而過

EQ話，上年去咗非洲參與關注當地非法象牙貿易問題嘅活動，但同李冰冰擦身而過，因為李冰冰比EQ早幾個月參與有關活動。EQ話佢一直負責香港立法層面嘅工作；李冰冰負責公眾教育。


至於未來會點樣推廣立法禁止象牙貿易，EQ話會繼續爭取市民支持，令政府盡快立法；同時會辦展覽會同寫書。葛珮帆參選沙田頌安區議會選舉，對手有工黨嘅葉榮。