一哥悼殉職同袍 提六七暴動

【明報專訊】噚日係警隊紀念日，香港警務處退役同僚協會、皇家香港警察協會成員，同多名前警員亦有出席儀式，悼念因公殉職嘅香港警隊同輔警人員。警務處長盧偉聰（左圖）喺致辭嘅時候特別提到要向殉職嘅同事，「包括於1967年暴亂中殉職的警務人員，致以崇高敬意」（右圖）。


「一哥」盧偉聰仲話，警務人員執勤期間經常身處險境，生命隨時受到威脅，就好似之前有同事喺西區英勇制服追斬途人嘅疑犯，證明警隊從不畏縮，並竭盡所能維持社會嘅安全同穩定。


今次盧偉聰特登喺致辭度提及六七暴動殉職警員，唔知係咪同之前警方網頁被指「鬼祟」刪走六七暴動歷史有關呢？之前有高登仔揭發警隊改網頁，刪走唔少六七暴動時警察平亂嘅細節；盧偉聰曾出嚟解釋，話精簡版係方便市民睇，遲啲會上載「原汁原味」版本。但家都仲未見到，Emily都好期待佢哋講多啲有關警隊喺六七暴動時嘅歷史。