施政報告諮詢 阿媽煮餸片宣傳

【明報專訊】新一份《施政報告》同《財政預算案》將於下年1月及2月發表，政府今年繼續跟過去幾年嘅做法，將施政報告同財政預算案合併諮詢，話方便社會各界全面討論，政府就設立網站，邀請公眾發表意見，仲製作咗條短片吸引市民。


短片提到一家人食飯，老爺話想食豆腐，阿仔要A5和牛，阿女要沙律，老公就想食燒肉，話既然一家人食餐飯都有唔同意見，咁同大家息息相關嘅施政報告同預算案，大家都要發表意見喎。短片無講最終一家人有咩食，不過相信各界對施政報告一定有好多唔同意見，政府亦無可能滿足大家，唔知政府喺施政報告後，會唔會同大家講其實都係「限米煮限飯」呢？


Emily聽聞，特首梁振英下個月就會陸續與唔同政黨、團體見面聽意見，但暫時未有計劃搞地區諮詢論壇。