點解入梁班子？ 高永文話被CY政綱吸引

【明報專訊】食物及衛生局長高永文自從加入特首梁振英嘅班子之後，一直係民望評分最高嘅局長，佢噚日喺電台節目，就回首點解當初肯走入呢個「熱廚房」。高永文話雖然梁振英無「三顧草廬」邀請佢加入政府，但對方嘅政綱吸引到佢，令佢覺得草根階層可以分享到更多經濟成果之餘，又為社會帶來更多公義咁話。咁高局長認為梁振英有無落實到政綱呢？佢就話梁振英呢3年嘅工作係「有進展」。


高局長今年5月推銷政改方案嗰陣，對住一個市民高呼「講完」，成為全城熱話，主持問佢如果有得回到過去，佢仲會唔會咁講呢？高局長話佢嗰刻咁激動係因為介意有人話佢「呃細路」，但講咗出口嘅嘢就無謂後悔。問到做醫生定局長辛苦啲，高局長嘅答案係﹕「你問我，我都係鍾意做醫生多啲」。