生日玩鼠戰中環 莫乃光成績躍進

【明報專訊】一年一度嘅「鼠戰中環」接力慈善賽噚日舉行，超過500個參加者一如以往，費盡心思打扮、設計佢哋嘅團隊服飾，令到噚日朝早中環好似嘉年華一樣咁熱鬧，唔少人以卡通造型參賽，好似美國隊長、壞蛋掌門人、阿拉丁、龍珠、米奇老鼠等。部分參賽者反串，有男士就扮公主，著住裙跨過障礙賽道，場面搞笑。


民主黨單仲偕及涂謹申、資訊科技界議員莫乃光（Charles）亦有同傳媒朋友組隊參加，佢哋今年無扮咩卡通人物，但個個著晒夏威夷恤，戴埋帽咁參賽，造型唔算求其。


嘆失落「最具鼠戰精神獎」

Charles噚日51歲生日，唔知係咪壽星公「當旺」，佢話今年成績比往年「大躍進」，因為以前年年都係包尾或者接近包尾，但今年竟然有十幾隊人慢過佢哋。佢仲嘆氣話因為咁而失落「最具鼠戰精神獎」，認真可惜喎，不過佢話呢個活動都令佢有個難忘生日。而佢班隊友亦好有心，送咗張生日卡及蛋糕造型嘅帽畀佢戴住參賽。


涂謹申參選區議會油尖旺奧運選區，同區有高曉榮參選。