逾5000人想做CY個friend 梁班子fb大比併

【明報專訊】特首梁振英（CY）前日開咗facebook戶口後，接住都有上載花果照同網民分享，網民爭相想加CY做「朋友」，搞到兩日內CY嘅fb已經去到5000個交友數量嘅限制，唔可以提出加人做朋友。不過，CY交「朋友」有篩選，目前有幸成為CY「朋友」嘅人主要係官員，財爺曾俊華就喺fb同CY做到「朋友」，而Emily就未獲選中。


蘇錦樑「朋友」4000多

唔少問責官員幾年前已經開始玩fb，目前最多「friend」嘅應該係商經局長蘇錦樑，有4000幾個fb「朋友」，蘇錦樑早於2010年就活躍於fb。fb年資最深就係發展局長陳茂波，2008年就開始玩，即fb喺全球開放註冊無耐。


財爺fb最「open」

財爺雖然今年初先開fb，但現時已有逾3000幾個「朋友」，佢平日主要上載工作相同輕鬆生活照「呃like」。特別嘅係財爺同唔少網民做「朋友」，所以唔少人都可以喺財爺fb留言，當中有人會向財爺提供政策上嘅意見，不過Emily就未見過財爺回覆留言。


CY噚日發咗兩個帖，分別介紹荷花種子，仲話要令種子發芽好有挑戰性，問網民﹕「要不要試？」CY並上載紅肉火龍果相，講解點樣種果得果。睇睇上載時間，CY係喺返工前同放工後先玩fb，雖然網民唔可以留言，但CY嘅帖都有幾百個like。