廠商會食品嘉年華 唔怕遊客減

【明報專訊】第4屆香港食品嘉年華10月31日到11月8日喺葵涌運動場舉行，今年嘉年華以「健康飲食與生活」為主題，有超過270個攤位，啱晒Emily我呢啲咁注重健康嘅人。不過今年1蚊產品特賣似乎無乜睇頭，原價最貴嗰個都只不過係湯包。


稱建港珠澳橋必增陸客

之前見內地遊客喺工展會拖晒大篋瘋狂掃貨，但近期呢段時間來港旅客人數減，主辦單位會唔會擔心對生意有影響呢？香港中華廠商會會長李秀恒一於無有怕，佢話嚟嘉年華嘅人，有六七成都係本地客，唔驚有大影響。佢仲話港珠澳大橋起咗，內地旅客一定增加，叫大家包容一下。副會長戴澤良就話開頭真係有啲擔心，但參展商反應熱烈，仲好有信心今屆入場人次會比上屆增加約一成。