被問唔開評論功能 CY：仲學緊 話推介「鈺成主席」去馬爾代夫

【明報專訊】特首梁振英（CY）日前開facebook與網民分享生活點滴，旋即引來關注，佢噚日去行會前都有回應自己開fb心得。被問到點解唔開放評論功能，係咪驚太多負評，佢笑言「家都仲學緊」，感嘆自己「呢個年紀嘅人做fb，點都無你（記者）呢個年紀做咁容易，我一步一步做啦！」


話曾鈺成「相當滿意」

CY連續第三日更新fb，噚日朝終於唔再齋講花果，而係講吓遊山玩水。一般人玩fb，會將最新見聞上載，但CY都幾另類，佢上載自己大半年前去馬爾代夫嘅「舊聞」，讚嘆去過「馬代」就唔會想去其他地方玩水。


CY仲話曾推介立法會主席曾鈺成暑假去呢度度假，對方玩完返嚟後話「相當滿意」。


雖然CY炒咗曾鈺成細佬曾德成魷魚，但CY喺fb就親切地稱呼曾鈺成為「鈺成主席」；曾主席亦好大方，like咗CY嘅post。CY噚晚再接再厲，繼火龍果同葡萄後，上載咗水蜜桃相。


CY用fb谷人氣，而最新嘅港大民意研究計劃民調，CY嘅民望評分較10月頭輕微上升1.5分，至41.3分。CY最新支持度為24%，反對率59%，民望淨值為負35。